TNPSC தேர்வில் புதிய மாற்றம்; இனி இந்த முறையில் தான் தேர்வு நடைபெறும் - முழு விவரம்:

 

தமிழக அரசின் பல்வேறு துறைகளில் இருக்கும் காலிப்பணியிடங்கள் தமிழ்நாடு அரசு பணியாளர் தேர்வாணையம் (டிஎன்பிஎஸ்சி) மூலம் போட்டித்தேர்வுகள் நடத்தப்பட்டு நிரப்பப்படுகிறது. குரூப் 1, 2 மற்றும் 2ஏ, குரூப் 4, ஒருங்கிணைந்த தொழில்நுட்ப தேர்வுகள் என உள்ளிட்ட பல்வேறு வகையான போட்டிகள் தேர்வுகள் டிஎன்பிஎஸ்சி மூலம் நடத்தப்படுகிறது. இந்நிலையில், டிஎன்பிஎஸ்சி நடத்தும் தேர்வுகளுக்கான ஓஎம்ஆர் தாளில் சில புதிய மாற்றங்கள் கொண்டுவரப்பட்டுள்ளது. இதற்கான அறிவிப்பை டிஎன்பிஎஸ்சி தேர்வுக் கட்டுப்பாட்டு அலுவலகம் வெளியிட்டுள்ளது.

இதுகுறித்து டிஎன்பிஎஸ்சி வெளியிட்ட செய்திக்குறிப்பில், தேர்வாணையம் OMR விடைத்தாளில் ஒரு சில புதிய நடைமுறையினை அறிமுகப்படுத்தியுள்ளது. புதிய OMR விடைத்தாளின் மாதிரி படமானது தேர்வாணைய இணையதளத்தில் www.tnpsc.gov.in - "OMR Answer Sheet Sample" என்ற தலைப்பின்கீழ் பதிவேற்றம் செய்யப்பட்டுள்ளது. 

வினாத்தொகுப்பு எண் வட்டங்கள் கருப்புநிற பேனாவினால் (ballpoint pen) நிரப்புவது தொடர்பாகவும், மேலும், பக்கம்-1ல் பகுதி-1ன்கீழ் உள்ள கண்காணிப்பாளரின் கையொப்பம் பக்கம்-2ல் பகுதி- 1ன் கீழ் மாற்றப்பட்டுள்ளதும் மாதிரி விடைத்தாளில் காட்சிப்படுத்தப்பட்டுள்ளது. எனவே, தேர்வர்கள் தேர்வாணையத்தினால் நடத்தப்படும் இனிவரும் தேர்வினை எழுத வருவதற்கு முன்பு புதிய OMR விடைத்தாளின் மாதிரியை பார்த்து அறிந்து தேர்வு எழுத வருமாறு அறிவுறுத்தப்படுகிறார்கள்” என்று தெரிவிக்கப்பட்டுள்ளது.  

ஓஎம்ஆர் தாளில் "இன்வேலிட் மதிப்பெண் முறை"
கடந்த குரூப் 4 தேர்வு முதல் ஓஎம்ஆர் தாளில் இன்வேலிட் மதிப்பெண் முறையை டிஎன்பிஎஸ்சி அறிமுகம் செய்தது. இந்த முறைப்படி ஓ.எம்.ஆர் தாளில் A, B, C, D மற்றும் E என 5 கட்டங்கள் கொடுக்கப்பட்டு இருக்கும். கொள்குறி வகை (Objective Type) படி, வினாத்தாளில் 1 கேள்விக்கு 4 ஆப்ஷன்கள் இருக்கும், அதற்கு A, B, C, D என்பதில் சரியான விடை ஓ.எம்.ஆர் தாளில் நிரப்பப்பட வேண்டும். ஒருவேளை அந்த கேள்விக்கான பதில் உங்களுக்கு தெரியவில்லை என்றால், E என்ற வட்டத்தை நிரப்ப வேண்டும். அந்த கேள்விக்கான பதில் இன்வேலிட் என எடுத்துகொள்ளப்படும்.

இனி வரும் காலங்களில் டிஎன்பிஎஸ்சி மூலம் நடத்தப்படும் தேர்வுகளில் இந்த புதிய OMR தாள் பயன்படுத்தப்படும் என தெரிவிக்கப்பட்டுள்ளது. தேர்வர்கள் மாதிரி தாளை பார்த்து அறிந்துகொண்டு தேர்விற்கு தங்களை தயார்படுத்தி கொள்ளலாம்.  

2025 டிஎன்பிஎஸ்சி திட்டம்
2025ஆம் ஆண்டிற்கான தேர்வுகளின் ஆண்டுத் திட்டம் 10.10.2024 அன்று டிஎன்பிஎஸ்சி வெளியிட்டது. அதன்படி, இந்தாண்டு குரூப் 1, 2 மற்றும் 2ஏ, குரூப் 4 உட்பட மொத்தம் 7 போட்டித் தேர்வுகள் நடத்த திட்டமிடப்பட்டுள்ளது. தேர்விற்கான அறிவிப்பு வெளியிடப்படும்போது, அதற்கான காலிப்பணியிடங்கள் விவரங்கள் தெரிவிக்கப்படும்.