இனி இப்படிதான்.. குறைகிறது பள்ளி மாணவர்களின் கோடை விடுமுறை நாட்கள் !!

 தமிழகத்தில் ஒன்றாம் வகுப்பு முதல் 12ஆம் வகுப்பு வரையிலான மாணவர்களுக்கு நேரடி வகுப்புகள் கடந்த ஆண்டு செப்டம்பர் தொடங்கி நடைபெற்று வருகின்றன. பிளஸ்-2 மாணவர்களுக்கு பொதுத்தேர்வு மார்ச் மாதத்தில் தொடங்குவது வழக்கம். அதனைத்தொடர்ந்து 10 ஆம் வகுப்பு பொதுத் தேர்வும் பிற வகுப்புகளுக்கான ஆண்டு இறுதித்தேர்வு நடைபெறும்.

நடப்பு கல்வி ஆண்டில் பள்ளி நேரடி வகுப்புகள் தாமதமாக தொடங்கியதால், பொதுத் தேர்வுகள் மற்றும் இறுதித்  தேர்வுகள் மே மாதம் இறுதிவரை நடைபெறுகிறது. அதாவது, 12ஆம் வகுப்புக்கு பொதுத்தேர்வு மே மாதம் 5ஆம் தேதி தொடங்கி 28ஆம் தேதியுடன் நிறைவு பெறுகிறது.  

அதேபோல், 11ஆம் வகுப்பு மாணவர்களுக்கு மே மாதம் 9ஆம் தேதி ஆரம்பித்து 31ஆம் தேதி வரையும், 10ஆம் வகுப்புக்கு மே மாதம் 6ஆம் தேதி தொடங்கி 30ஆம் தேதி வரையிலும் நடைபெற உள்ளது. 

இதுதவிர 6 முதல் 9ஆம் வகுப்பு மாணவர்களுக்கு மே 5ஆம்தேதி முதல் 13ஆம் தேதி வரை ஆண்டு இறுதித்தேர்வு நடத்த வேண்டும் என்று தெரிவிக்கப்பட்டுள்ளது.  1 முதல் 5ஆம் வகுப்பு வரையிலான மாணவர்களுக்கு மே 13ஆம் தேதி கடைசி வேலைநாளாக அறிவிக்கப்பட்டுள்ளது.

இந்த நிலையில் அடுத்த கல்வியாண்டுக்கான (2022-23) அனைத்து வகுப்புகளும் ஜூன் மாதம் 13-ந்தேதி தொடங்கும் என்று கல்வித்துறை அறிவித்துள்ளது. 11ஆம் வகுப்பு மாணவர்களுக்கு மட்டும் 24ஆம் தேதி முதல் வகுப்புகள் நடைபெறும் என்று தெரிவிக்கப்பட்டுள்ளது.  இதனால் இந்த ஆண்டு பள்ளி கோடை விடுமுறை காலம் வெகுவாக குறைந்துள்ளது.